Le Cicuzze 2016 di Camillo Ferrara

Le Cicuzze 2016 di Camillo Ferrara

postato in: aCapua, News, notizie dal web | commenti

 

Cicuzze 2016
Ah ! Capua, Capua, Capua,
pure ‘st’anno mm’he’ affussato ma ìi ‘o stesso so’ turnato
p’ unura’ stu Carnevale sempe cchiu’ povero e arrunzato ,
sturiato e urganizzato dint’’o ggiro ‘e poche jurnate,
dall’ennesimo cumitato ca pure st’anno ll’ha salvato.
E ss’e’ ripetuta ‘a stessa storia ca sapimmo, gia’, ’a mmemoria,
che vo’ ca ‘e tradezione ‘e sta Citta’ ss’hanna tutte cancella’
a’ dint’’a storia gluriosa ‘e chesta “ nobbele speciosa”
pe’ ll’assalto pruditorio ca lle port’‘o guazzatorio.
E comm’’o Carnevale, ll’affiliate ‘o carruzzone,
hanno cancellato a’ chesta Capua ‘e mmeglie tradezione
primma ll’hann’addebbulite e po’ ll’ hanno miso sott’acito
senza ca tu, populo ammanzito, fusse muosse maje nu rito.
‘E ffiere ‘e Santu Stefano e chell’’e Santu Lazzaro
‘a festa Assunta a cchiazza so’ fernute int’’o scamazzo
comm’a festa do grano,’o vinticinche aprile
e ‘e ffeste riunale cch’erano bbelle e uriginale.
Ma quanno, quaccheduno, p’amore da Citta’,
ha tentato cu tutt’’a forza de repristina’,
‘e Nerone e ‘e Caligole ll’hanno fatt’ accuppa’
minacciann’’e ferma’ ’a ggiostra,addo’ stann’ a ggira’.!
Percio’ ‘a storia mia ca e’ longa cientetrentanne,
sta’ scarenne e sta’ fernenne grazie a sti mezacanne
che a’ anne, anne e anne , c’’a cumpricita’ ‘e stu palazzo,
so’ gghiute int’’o scamazzo pe’ ccolp’’e sta malarazza..
Iì ero ‘o rre Rre ‘ncuntrastato, reveruto e usannato,
ma, po’, mm’hann’appezzentuto e chianu chianu so’ fernuto,
ma so’ rimasto dint’’o core ‘e tutt’’e vere capuane
che se sonnano e ss’aspettano ‘o riscatto ‘e chesta festa.
Ii ero grande, grande assaje e de magnificenza vera
e purtav’’ogn’anno a Capua ‘e migliare ‘e furastiere,
ìi ero ‘o Carnevale ca ‘nsiem’’o devertemento
purtavo pane e fatica a centenar’’e ggente.
E chelle ffeste lla’ nun se ponno cchiu’ scurda’
pecche’ ievano passo passo c’’o prestigio da Citta’
ca ss’appriparava e se faceva mmiria’
da chi ogge ll’hann’arrubbato prestigio e nutorieta’.
Lummenaria, carri allegorice,gruppe ammascherate
Pullecenelle, mascarelle, domene a migliarate
vecchie ‘e carnevale , gruppe umoristice
e tutt’’o riesto ca le faceva a’ degna curnice.
E ’o populo nfesta c’abballava pe’ strate,
menanno curiandole cunfiette e ciucculate,
stelle filante ,trumbette,sciosciammocche
ca ‘o furastiere lle facevan’addecriava ll’uocchie.
Scardino,’e Marchesane,’e Giugno,’e Gaglione,
Cirillino Galbiate, Femiano,Montuore, Etna ‘o Scucchione
erano ‘e cerevelle e ll’aneme ‘e sta manifestazione
‘nsieme a tant’ate ca stann’’a gloria ‘e cardone.
E mmo’ tutt’ e’ fernuto ’a ccarte quarantotto,
provole e prusotte e ìi ce sso’ gghiuto pe’ ssotto,
primm’ hanno sviziato, po’ se so’ aggarbate
e ‘a fine de cunte aret’ìi ll’aggio pigliato.
Inzomma stu Carnevale che ha perz’’a via maesta
ha fatt’’a stessa fine da scola ‘e cartapesta,
quanta tiempo e denare ca ce so’ state jettate
e quanta fessarie ca cc’hannu cuntato.!
Ll’elenco sarria luongo ‘e ll’autore ‘e sti misfatte
c’hanno tenuto pe’ comprice trafechine e alliccapiatte
ma ìi ‘e voglio cundanna’ pecche’ hanno rat’’o sfratto
a ‘sta festa e a sta Citta’ ca e’ redotta a na ciavatta.
Ma chello ca e’ stato e’ stato,
cchi ’avuto avuto e cchi ha rato ha rato,
so’ ccose d’’ o passato dice chi h’atterrata
‘a regina de ffeste ‘e ‘sta Capua sfurtunata.
Ma tu saje comm’e’ gghiuto e, pure, comm’e venuto
e nun tt’agg’’a dice ìì chi c’ha magnato e c’ha vevuto,
ma na cosa sola e’ ccerta, e nun se po’ mmaje anneia’
ca sta festa ha fatto, pare pare, a stessa fine ‘e sta Citta’.
Ma ‘o mmale, populo mio a cchi ll’ hannu fatto
tutte chille persunagge ‘e na pulitica dd’accatto,
chella ca do piano nobbele cc’ha mannat’’o pianomatto
cu ‘e pezze a cculo e cu ‘a tavula senza ‘o piatto.
Chist’ era ‘o destino niro ca ll’avev’ appriparato
na morra ‘e traretore e de disamorate,
ca ‘nsiem’’e pescecane e a’ ‘e pisce affocagatte.
mm’hannu primma spurpato e po’ mm’hann’ affussato.
Nun ce vulevan’’e scenziate pe’ ‘ngarra’ chesti jurnate
abbastava ,ca ‘a tiempo debito, ce se fosse preoccupato
‘e furma’ nu cumitato, commo DDio ll’ha cumannato,
pe’ dda’ a sta Citta’ nu poco ‘e sciato pe’ campa’.
Mmece , ogn’anno, doppo ‘e ssolete prumesse ,
ca se fanno,comm’a ssempe, quann’e’ fernuta ‘a festa,
prumesse e euforia tornano ‘nt’’o disinteresse,
e ss’aspetta ca vene n’ata vota gennaio ‘e ll’anno appriesso.
E sso’ passate ‘e cchiu’ ‘e mmita’ ‘e ll’anne da vita mia
a senti ogn’anno ‘e stesse fessarie
a parte coccheduno che armato ‘e vulunta’
c’ ha dato bbona prova ‘e ce sape’ ffa’.
Ma quanta male ce vulimmo fa’ ? Ma overamente stamm’a ffa’?
Chi nunn’e’capace ‘e urganizza’ ss’hadda manna’ a cammena’!!!
E’ ora c’ hadda ferni’ ‘o tiempo‘ de vacche grasse
pe’ cchi ha pruvucato chistu ddio ‘e scunquasso !
Ss’hadda vere’, finalmente, addo’ ss’annasconn’’o nureco,
pecche’ c’avimma leva’,pe’ ssempe, a’ capo chistu ruseco,
vulimmo capi’ si e’ overo ca chest’ ex festa
serveva a coccheduno pe’ se ienchere ‘a canesta. !
Nt’’a ogne ccose ca se fa’, ce sta’ quaccosa ca nun vva’
e stu quaccosa ca nu vva’ ha distrutto sta Citta’
che ha sempe campata ‘e cummercio e de cultura
primma cc’a facevano fernì scauza e annura.
Ma vuje attuorno ve guardate? O fusseve cecate ?
Nn’‘a verite ‘a desulazione ‘e sta Citta’ senza patrone ?
A Capua nun ce sta’ cchiu’ niente, simmo na Citta’ pezzente,
insomma,in poche parole, nun gghiammo proprio niente.!
Tutto cc’hanno sceppato, ‘e de tutto cc’hannu spugliato
senza ca nisciuno sse nn’he’ mmaje preoccupato
‘e defennere ll’interesse ‘e sta’ citta’ scarpesata
d’’e tante Cesare Borgia ca ll’hannu amministrata.
A botta ‘e ricotta e a bott’’e prusotte
eramo patrone ‘e mmo’ simmo sotto
grazie pure a nnuje, ca p’’a troppa ‘ndifferenza
chesto cc’’o purtammo ‘ncopp’’a cuscienza.!
Comm’appena so’ arrivato ‘o ssaie cch’ aggio penzato ?
Ca staje desertificata peggio ‘e ll’anno passato,
nun se vere ‘n’anema viva ‘e cammena’ p’’e vvie,
ce camminano sulamente ‘a puverta’ e ‘o currivo!
E ‘a prova generale e’ stata fatta gia’ ‘a Natale
quann’‘o Bammino, appena nato, se n’e’ subbeto scappato ,
pecche’ nun puteva suppurta’ ‘a desulazione ‘e sta Citta’
ca senza cchiu’ interesse e’ ll’ombra ‘e essa stessa !
Ma commo ‘o Bammeniello puteva nascere cca’
si nun ce steva manc’’a paglia p’’o pute’ cucca’?
Si chesta’ Citta’ nosta, ca e’ gghiuta ‘ndecadenza
lle ffa’ a’ paricchio tiempo, na pessem’’ accuglienza !
Simmo scarute d’’o core pure ‘o Pate, ll’Unniputente,
chillo ca tutto vere e che tutto sente,
e che a vere’ chesta miseria e tutto stu squallore
ha penzato ca pe’ Capua, nisciuno cchiu’ ce ten’ ammore.
Doppo ‘a famma natalizia, ca ll’ha rato sulo cunesse
ha parlato pe’ cummerciante sulo Gennaro Sessa
ca commo capo do Cummercio ha sempe faticato
pp’evita’ tutt’e guaie ca so’ state cumbinate.
Pecche’ Gennaro, a’ tiempo, ha dato ll’avvertimento
ca si Capua nun se ‘ndustria, pe’ ffa’ venì ‘a ggente,
sicuramente murarra’ ‘e pecundria ,‘e famma e stiente.!
Ma chi ava pruvvere’ nun ce vere e nun ce sente.!!!
Ma, allora, ‘e tutte sti monumente e de tutte ‘st’antichita’
coccheduno ce vvo’ dicere che ne vulimmo ffa’,
ll’avimma vutta’ nterra , ll’avimm’’appiccia’
inzomma cocche ccosa pure c’avimma ‘nventa’ .!!
Mmece io mmo’ ve doco na miraculosa ‘mmerecina,
chella ca serva a sta’ citta’ pe’ turna’ Regina,
mettimmece tutte ‘nsieme mmece ‘e cc’appicceca’
e vedite commo vola chesta bbellissima Citta’.
LLevamm’ a’ miez’’a pulitica, ‘ammiria e ‘a gelusia
e scrivimmo na pagina nova , cu ll’aiuto ‘e Ddio,
pe’ dda’ nu dimane nuovo a ‘e giuvane ‘e sta Citta’
ca cercano, comm’’o ppane, ‘a fatica e ‘a dignita’.
Ma tu,populo, pe’ ffa’ chesto tt’he’ guarda’ dint’’a cuscienza
e nunn’ he’ cerca’ cunziglio e nunn’ he’ cerca’ licenzia,
he’ penza’ sulamente ca Capua e’ ‘a mamma toia
e tu nunn’a puo’ lassa’ mman’a na vranca ‘e bboje.!
Pe’ cchesto io teco ll’obbligo e ‘o duvere ‘e tt’avvisa’
ca e’ ffa’ bbon’attenzione mmo’ ca vvaje a vuta’,
nun sentì ‘e pifferaie, ‘e balzane e a ‘e cuccuvaie
sceglite ‘o mmeglio ca ce sta’, p’’o bbene ‘e ‘sta Citta’!
Nun da retta sì so’ janco, russe, nire o paunazze,
accuorto sulo ’e parulaie cc’arrevotano ‘sta chiazza,
te fanno vere’ ‘a luna dint’’a bagnarola
c’’o scopo ‘e te fa’ care ‘nt’’a soleta tagliola.
E pp’evita’ ca quaccuno te mette ’a mussarola
mittete ‘a cculo ‘na bella stagnarola
pecche’ sti parlettiere ca so’ zoccol’’e scugliera
so’ cazze e te leva’ pur’’e ’e rigiole ca tiene sotto ‘e piere.!
Po’ ce sta’ chi cu gentilezza te vO’ mulla’ ‘o piezzo
pe’ te tira’,n’ata vota, dint’a stessa rezza,
apprummetteno, p’’a millesima vota,‘o riscatto ‘e sta Citta’
ma nun sape manco isso che tt’ hadda’ cunta’.
Ma si tu , overamente , vuo’ cagna’ ‘o registro
ffa’ sparì, a’ copp’’a scena, palliste e basiste
e , po’, vutt’’ a mmare, senza nisciuna pieta’,
a cchi trase nt’’a casa toja pe’ te venì a ‘mbruglia’.
Po’ doppo ca he’ capito ‘o bbuono e ‘o mal’ andazzo
scigliete , cu calma, ‘o meglio cavall’’e razza
ca nun adda’ sape’ canta’ ‘a soleta canzone
e ca nun hadda’ penza’ sultant’’o cannarone.!
Se sente gia’ nt’all’aria ‘o viento ‘e ll’elezione
se stanno muvenno gia’ dduje, tre Brancaleone
ca stanno tutt’’e juorne nt’’e vvie e dint’’e cchiazze
pp’arruola’ ‘e candidate adatte a stu Palazzo.
A destra ll’ avvocato sta’ gia’ a tira’ ‘a vulata
pecche’ ‘a successione ll’e’ stata assicurata,
pero’ adda’ fa’ ‘e cunte cu na specie ‘e cespuglio
ca parla, sotto sotto, pure cu Tre luglio !.
A sinistra se sta’ aspettanno ancor’‘a fumata bianca,
so’ mise ca se parla , se discute e che ss’arranca,
forze tra ‘n’anno sapimmo ‘o dommene austino
ca ss’ era candidat’a primmo cittadino!
Ma chesta ‘e na varca ca nun resistarra’
dint’’a tempesta ‘e mare ca sta’ pp’arriva’
se sente gia’ ‘o sentore ‘e ammutinamento
a’ parte e’ cocche nucchiero ca nunn’e’ cuntento.
‘O centro mmece ce sta’ ‘a stessa furmazione
ca ha fatto gia’ ‘o bidone a chest’ st’ammnistrazione
e po’ ce starra’ chi fatica ‘nsilenzio e annascosto
pecche’ tene ncapo ‘e saglì ‘ncopp’’a quassiasi giostr
Po’ ce sta’ chi nu parla nu vere e nu sente
ma st’appriparanno nu sicchio ‘e acqua vullente
ca quanno sarra’ abbruciarra’ speranze e speranzelle
a chi vedarra’ no 5 ma migliar’ ’e stelle.
Po’ ce sta’ n abbona massa ‘e purtature d’acqua
addo’ ce stann’’e tuoste e ce stann’’e sciacque
ma chiste so’ destenate a scumparì leste leste
pecche’ passato ’o santo.passa pur”a festa.
Inzomma ce starranno cchiu’ candidate ca vutante
tutte pronte a ss’assetta’ ncopp’a cchille scranne
addo’ io ce mettesse sulo nu liquidatore
pe’ pava’ tutt’‘e diebbete che sso’ ‘e tutt’’e culure.
Ma chi cunosce ‘a pulitica e chisti fratielle
dice ca pe’ salva’ Capua ce vo’ sul’’o Pataterno
ca si nun ce mett’’a mano addio sogni di gloria
perdimmo, pe’ ssempe, ‘o nommo e perdimmo pur’’a storia.E Gennaro ava ragione a tira’ ste cuncrusione
e nun ce se po’ da’ tuorto, pecche’ vene do muorto,
a Capua niente ss’e’ muosso e manco sfreccecheiato
pecche’ e’ na Citta’ morta, e’ na Ferrari scunquassata.
Ma ce sta’ n’ommo – nuvita’ capace ‘e cagna’
‘o destino ‘e sta Citta’ ca se vo’ arrepiglia ?
Ce sta’ ‘n’ommo ‘e qualita’ ca po’ aiuta’ e piluta’
chesta’ nosta juventu’ che a campa’ nun c’’a fa’ cchiu’?
E chiossa’, chiossa’! Io crere ca c’adda’ sta’,
annascosto nt’’a ll’ammore ca sente p’’a Citta’,
nu Caronte serio e unesto ca ce po’ traghetta’
a’ st’inferno ‘e puverta’ a’ nu futur’’e prusperita’.
Verso nu dimane chin’’e speranza, ‘e giustizia e liberta’,
e pe’ cchì nun tene niente ‘e aiuto e sulidarieta’,
pe’ cchi sta malato e allettato ‘e ll’assistenza ca nce sta’
e ‘a fatica ‘e capofamiglia ca nun ponno cchiu’ campa’.
Mmo’ ll’aria e’ suffucata, nun se move e nun venteia,
comm’a ogne ‘nniziativa ca ce nasce e, po’, anneia
int’’o silenzio assurdante , all’apatia e ‘a strafuttenza
‘e chi teness’’o duvere ‘e lle tene’ cchiu’ accurtenza.
Pure ll’acqua do Vulturno, cch’era limpedo e pescoso,
’e ciefare,capitune ‘e ammarielle e dd’ alose
de spigule , de tenche e na vota de sturione
se n’e’ gghiuto, pur’isso, a’ gloria ‘e cardone.
Mmo’ ll’acqua e’ addeventata culore ciucculato
quanno primma se veveva sott’a cchelle ‘nfrascate
de salice pendente, lla’, abbasci’ ‘a Limmata
addo’ se ce ijeva pe’ce se ffa’ ‘n‘ arrefrescata.
E pe’ tutto st’apatia e pe’ tutto st’ abbandono
me sento pur’ì nu Rre senza curona.!
Nun teco cchiu’ carrozza, e nun teco manc’’a corte
mentre ‘a vita ‘e chesta festa se fa’ sempe cchiu’ ccorta.
Ogn’anno ca passa se va’ semp’’e cchiu’ abbascio
dint’’a cchesta Citta’ ca e’ tutto nu sfascio.!
Ma commo putimmo cchiu’ penza’ a cc’’arrepiglia’
si nu sapimmo manco nuje addo’ amma ìi a para’?
Ma quale Carnevale a Capua se vo’ fa’
se nun tenimm’’e sorde manco pe’ magna’ ?
Tenimmo na pacienza ca c’ha iencut’a panza,
ce simmo sfasteriate ‘e ce fa’ sulo lagnanze .
E’ arrivat’’o mumento ‘e fa’ ferni’ chistu rumanzo
che tene pe’ prutaguniste a cchi nun te da’ speranza.
Ma tu, nobbele populo , ca tien’’o deritto ‘e campa’
pecche’ nun tt’arrebbielle, ma a cchi staje ‘aspetta ?
Chist’anno me penzavo ‘e fa’ nu bbuono cumpleanno
visto ca, ormaje,teco cientetrentanne,
mmece so’ stato deluso, e sto’ assaje amariggiato
pe’ cchistu trattamento ca mm’hannu riservato.
Ma accussì e’ gghiuto e accussì aveva ì
fino a quanno ‘o Pataterno nunn’‘o ffa’ fernì,
e fino a quanno tu, populo ca sì rembecelluto,
nun te mitte sott’’o pero stu limone spremmuto.
Ma io te dico chesto, pecche’ te song’ affezziunato,
percio’ sientele bbone, sti Cicuzze arraggiate,
sientele bbone , e ffa’ bbona attenzione
e , all’urtemo se vuo’, tir’’e cuncrusione.
Ma io na cosa, pero’, tte ll’aggi’’a addumanna’,
e tu mm’ he’ risponnere cu tutt’’a sincerita’:
pecche’, doppo tutt’’e mmazzate ca tt’hanno chiavato
te sì sempe ‘nginucchiato annante a chi tt’ha massacrato ?
Pecche’ te sì sempe fidato ‘e chi nun tt’ha maje amato ?
Pecche’ ‘nt’’a malaparata, nunn’e’ cagnato strata ?
Percio’ ‘a ccolpa e’ ’a toia ca p’’a cannarutizia
sì gghiuto pe’ grazia e he’ truvata ‘a giustizia !
E cchist’’e ‘o risultato, ca nun te fusse maje aspettato,
dopp’ anne e anne ‘e pulitica spriggiudicata !
Ma tu overamente credive a cchilli palliative ?
E nunn’’o sapive ca cchelle ferute te purtavan’’o tavuto.?
E rerenno e pazzianno so’ passate cinquant’anne
chin’‘e fauze prumesse e de cocche cuopp’allesse,
ca te reva chi ‘mbrugliava e c’’a scusa ‘e te da spavo
te metteva ‘ncopp’’e spalle ’o peso ‘e sta mala trave.
Delenda Capua ! Ire ll’altera Roma
e mmo’ he fatt’’a fine ‘e ll’Ecce Homo !
Tt’hanno ultraggiata, tt’hannu sputato,
tt’hanno frustata e po’ tt’hannu ‘ncruciata.
E quanno stiv’ annante ‘o primmo Pilato
tt’hannu levat’’e vveste e se ll’hanno jucate,
e pe cchesto doppo secule ‘e gloria e d’ unore
mmo’ sì ‘a cenerentola ‘e Terra ‘e Lavoro.
Furono chille ca te prumetteten’o tarramoto
‘e primme ca te ngannareno, a’ uno a’ vota ,
doppo ca tt’ avevano giurato e sacramentato
‘e cagna’ nu sistema, allora, gia’ nfracetato .
Chell’ava essere ‘a generazione cc’aveva riscatta’
nn’epuca scura e nun ss’e’ pututo maje appura’
pecche’ avasciast’’o ponte levatore
pe’ ffa’ trasi’ ‘e ‘mbrugliune e traretore.
E te faciste vennere cu tutt’’e sentemiente
quanno pigliaste ‘a sputazza p’’a lira ‘argiento,
quanno tt’affidaste, cu fiducia , a nu masto,
ca sunav’’o pianuforte senza dice maje basta!
E doppo a cchisto, na generazione ‘e scruccune
te levaje a’ cuollo pur’’e cazune,
saglievano e scennevano chilli scalune
pe’ te straccia’ ’e ccarne ‘abbuccune ‘abbuccune.
E mentre te chiuvevano ‘ncuollo guaie a zeffunno
te cantave tu stessa ‘o desprofunno
e ripetive mpucundruta e rassignata :
accuss’ va’ ‘o munno
ce sta’ chi nata e cchi vva’ a funno !
E ffuje da tanno, ca pe’ ste temmerarie
accummenciaje pe’ tte’stu luongo calvario
fatt’’e ‘nganne , ‘e tranelle e de purcarie
ca te purtaieno,chiano chiano, a’ na lenta agunia.
Ma ‘e ladrune pero’, nun ll’hanno maje acchiappate
e manco tu ll’he’ varriate e ‘ncruciate,
pecche’ astutamente ss’a so’ defelate
dannete ‘a croce ca, tu sola, he’ purtata. 8
E mmo’, a vederte ’e suffri’ st’amara passione
sulamente na schiera ‘e poche perzone,
chelle ca tt’hanno amata e tt’hanno rispettata
cumbatteno, tutt’’e juone a cchi te fa’ ‘e carugnate.
Ma mo’ c’avimma ferma’, nu putimmo cuntinua’
pecche’ e’ arrivat’’o tiempo ‘e accummencia’
a canta’ dduje diasille salate e pepate
pure a ‘e fauze prufete ca tt’hanno strunziata!
Ma p’’e culumbrine e p’’e trafechine
e’ ggiusto dda’ pane a ppane e vvino a vvino!
Ricordate ‘o ditto adatto a e malandrine :
abbottate, dicette ‘o puorco ca ‘o truogulo e’ cchino !
Percio’ nun cc’avimma piglia’ sulo cu ‘e pulitice,
ca so’ ‘e primme c’avimma mette’ ‘ncurnice,
ma cu tutte chille, ca chi cchiu’ e cchi meno,
hannu ‘ngrassato panza e mazzo facenn’’e lecchine!
Apprufittammo da licenzia ca ce cuncede ‘a tradezione,
ca sulo a Carnevale ce fa’ sfott’‘o patrone
e a tutt’’e filosofe e a ‘e sante magnune
che hannu arrebbetato chisto che ffu nu Cumune.
Stu Municipio ca ‘a perz’’e stanche de rrote
e pare ca mmo’ stesso ss’abbocca e capota
pe’ troppe diebbete ca ll’hann’appesantuto
e pe’ troppe ‘ntrallazze ca so’ gghiute e venute.
E de stu periculo, ne sta a parla’ tutt’’a ggente,
dice ca surece e zoccole, d’amorcunzente,
hanno cagnato nave ca tene ‘a stessa rotta
‘e chella ca gia’ cc’ha fatt’’o pacco e ‘o contrapaccotto.
E ‘o mare da pulitica e’ cchino ‘e ‘sti nnave
ca vanno pe’ nu mare ‘e ‘mbruoglie e de bbiava
ca serve a ‘e temmuniere pe’ bbevere e magna’
‘e spalle ‘e sta nava ca sta’ a sprufunna’.
Allora, addecriamm’ all’amice a ‘e cunuscente
‘e furastiere, a ’e mascare e all’aneme ‘nnucente,
e a stu Cumitato arrepezzato, quase all’urtema jurnata,
che pure senza renare ‘a tradezione ll’ha salvata.
Allora onore e merito a cchi ss’e’ menato
nt’’e flutte ‘e stu mare tempestuso e chiacchieriato
pe’ salva’ ancora na vota sta bbella tradezione
ca era gia’ pronta a ffa’ ‘a fin’’e sarchiapone.
Ma mmo’ e’ venuto ‘o mumento cc’avimmo parla’
pure de sanguette ca zucan’’o ssang’ ‘ a Citta’,
tutte chelli zecche ca ‘nt’’o bbenne e dint’’o mmale
hannu dissanguato pur’’o carnevale.
Pecche’ tutt’o mmale ca sta nt’’a sta Citta’
nun vene sulamente ‘a chillu purtone lla’
vene pure da chille ca vonno ‘ntrallazza’
pe’ cerca’ ‘e ss’arrecchì e dde primiggia’.
E de chisti persunagge ce ne stanne a centenare,
so’ tutt’ ‘e sanguettare ca vonno ll’affare,
so’ chelle facce bifronte ca fann’’o doppio juoco
e po’ mmiezo Judece appiccian’o ffuoco.
So’ cchille ca se presentano sotto fauze spoglie
chille ca ‘o primmo viento fanno comm’e ffoglie
ca vann’ ’acca’ e alla’ c’’a speranza ‘e atterra’
sott’’e zizze do Cumune addo’ ponn’ì ‘allatta’.!Allora site pronte ? E iamm’ accummencia’
cu ‘a speranza ca nisciuno ss’avessa trammia’,
pecche’ ‘sti Cicuzze so’ ‘a sufferenza da Citta’
e ll’ammore spassiunato ca lle dda’ ’a capuanita’.
Ma mo’ metten’’e birille pure fora d’’e ccase
accussì quanno se iesce e quanno se trase
avimma pava’ na tassa ’e sulidarieta’
pe’ cchille ca ce careno e ss’hanna pava’.
Allora, salute ‘o Sinneco e a tutto stu Palazzo,
che ‘a cchiu’ ‘e miezo secule e’ ‘nfracetat’’e intrallazze,
e saluti sincere ’a cchi cu ‘a vecchia arte
te piglia pe’ cculo, juacann’ a dduje mazz’’e carte.
Salute a cchi dice ca Capua e’ nu monumento all’aperto
e ppo’ tutt’e turiste ss’e’ porta ’a Caserta
o a vere’ ‘a S.Maria, ‘e quann’era putente,
scurdannese ca Capua ‘e tutto nu munumento.!
Pero’ a sti persunagge mmo’ ll’ amma ‘sgamate
e sapimmo addo’ perde ‘stu ciceno singato
percio’ ìi ve cunziglio che a cchi c’ha fatto petaccia
ll’avimma fa’ passa’ pe ‘ dint’’o setaccio.
Nu rengraziamento a chi cumanna Stato e ‘a Regione
che cc’hanno fatto nu ddio ‘e bidone !
Hanno decretato, c’’o nuovo Piano Museale,
ca ‘o Museo adda’ fa’ ‘a stessa ca facett’ ’o spitale.
E nisciuno ha parlato a difesa ‘e sta Citta’
pecche’ a Capua veneno sulo pe’ ce sfrutta’,
percio’ quanno veneno pe’ te cerca’ ‘o cunzenzo
pigliale pe’ ppietto e falle scenn’’o riscienzo.
Diccello ca Capua nunn’’e tterra ‘e nisciuno
ca ‘e na Citta’ libera ca nun tene patrune
e ca dint’’a tutt’’a storia, ha semp’ addemustrato
ca nun se mmaje asservuta e nun s’e’ mmaje chiata.
Percio’ a tutte sti maleritte ‘e Cesare Borgia
e a chille ca ss’atteggiano a mastuggiorgie
mannele a ffa’ nculo senza pieta’
e dille ca Capua e’ povera ma chien’’e dignita’.
Salute a cchi sta’ ngrassann’ ‘e ccasse ‘e ll’IAP
ca vvo’ renare a tutte quante ma maje a cchi dich’ì,
ma acchiappasse ll’evasore, ca Capua nn’e’ cchiena,
accussì pavammo tutte quante e pavammo meno !!
Ma po’ pecche’ ce iench’’e cartelle pazze ?
Pecche’ uno ca gia’ ha pavato hadda esse rutt’o…
E’ ccolpa ‘e ll’IAP , e’ ccolpa ‘e stu Palazzo
o ‘e coccheduno ca,sotto sotto, ce pazzea e ce sguazza?
‘O Cumune dice ca e’ ccolpa ‘ell’ ufficio
e ll’Ufficio dice ca e’ colpa ‘e ll’IAP
ma mentre se passano sta palla ‘nfucata
povero a cchi sta’ mmiez’’a sta mala jucata !
N’ abbraccio e nu vaso a tutt’‘e disuccupate
ca campano annascoste ‘e chi cc’ha criate
e ca quanno chiamman’ aiuto nunn’’e sente nisciuno
pecche’ ‘o sazio nu crere maje ‘o riuno.!
Bonasera a stu Cumune ca a renare sta’ ‘nsagliuta
ma ca e’ ‘nu bancomatt pe’ cchì pigli’’e e carute
e cungratulazione a chille ca, nt’’a sta Citta’ chin’’e bbuche,
se so’ arreccute cu na sola caruta.!
Nu saluto carissimo a tutte chille palliste
ca vanno prummettenno ’a fatica a ‘e povere criste,
ma se stesser’accuorto ‘sti cullucator’’e strapazzo
ca, po’, cocche deluso lle po’ romper’’o mazzo !
Nu saluto, fervente, a cchi vo’ ‘e birille dissuasore
e a cchi ‘e struzzelle e ‘e votta ‘nterra a tutte ll’ore,
e nu saluto caro a cchi ce va’ a ‘nciampeca’
e vva’ ‘o Pronto Soccorso pe’ cerca’ ‘e….ss’appara’. !
‘N’abbraccio a cchi chiagne e fott’a cchi rire,
a cchi ver’’o dimane sempe cchiu’ niro,
e a cchi campa ,ogni juorno, ‘e speranze ‘e suspire
aspettanno ca ‘sta rota finalmente se ggira.!
N’abbraccio forte, ma overamente forte
a cchi vvo’ ìi ’o cumune pe’ gghìi a suna’ ‘o pianuforte
e a cchillo ca gia’ ss’e’ mparato ‘o stesso cuncierto
‘e chillo ca se pigliava, sotto sotto, ‘e carre cupierte.
Saluti a cchi tene ’o cane e ‘o port’ a ca…e a … passia’
e nun ss’accatt’a paletta pe’ pulizza’,
ma ‘a povera bbestia che ccolpa nn’ha
si tene nu patrone ca nu sape campa’ ?
Salute a cchi, a Carnevale, se magn’’a lasagna,
a cchi ,pe’ sta semmana, ntene ll’uocchie pe’ chiagne
e a ’e galuppine ca ss’’a fanno ca saciccia e … ricotta
‘e spall’’e sta Capua ca vva’ sempe cchiu’ sotto.
Nu saluto e nn’abbraccio a ‘e Vigile Urbane
ca a Capua stann’ arraggiate peggio de cane,
ca DDio ‘e scanze da ‘e jastemme menate
da tutt’’e cittadine ca so’ state multate.
Nu caro saluto a cchi nun pav’’e pesune
a cchistu Cumune ca fa’ ‘o Pantalone
e a cchi aiza e votta ‘nterra case e ‘e palazze
senza ca nisciuno le vva’ a romper’’o …azzo !
Nu vaso a cchi a’ notte va’ a durmì ’o Palasciano,
‘o spitale ca e’ stato ll’ urgoglio de capuane,
che mmo’ ll’ASL ha redotto a albergo a ore
pe’ cchi ,doppo miezojuorno, ce va’ a ffa’ pur’ ‘a cuntrora.
Chist’e’ ‘o signale ca so’ pronte a sceppa’
chello nu poco ‘e Sanita’ che a Capua ce sta’,
stanno mettenno ‘ncundizione pur’‘o distretto
che quanno cchiu’ ampressa se fa’ pur’isso ’ ‘o biglietto.!
E futtenne futtenne , a biglietto e a biglietto
c’hannu redotto nu scendiletto
addo’ chi vo’ ce cammina e ce sputa’ ‘nccoppo
pe’ ccolpa e’ sta pulitica fatt’’e pecore zoppe.
Nu saluto ‘a Regione ca cu ‘a spending rewe
vo’ sparagna’ sempe cu cchi nun c’’a fa’ cchiu’
a suppurta’ tasse, tassulelle e addiziunale
ca ce stanno facenno caca’ ‘nt’’o ritale.
Ma e’ na spending rew intelligente
leva’ ll’ufficie do spitale pe’ manna’ a pagamento?
Ah, povere a nnuje mmano a sti ‘ncantatore !
Si fusse ’a Corte de Cunte ‘e facesse pava’ a lloro.!
Auguri e cungratulazioni a cchi tene p’e vizio
‘e custruì na casa senza ‘a licenza edilizia
e a cchi, autorizzato a ss’’arapì unu vano
po’ ss’aiza nu palazzo ‘e cinche- seie piane.!
Nu saluto e nu penziero a cchi nun pav’’a mmunnezza
e vva’ dicenno ‘ngiro ca camp’’e destrezza
e chest’’e overo pecche’ pe’ sti faccia d’abbrunzo
‘a mmunnezza lloro a’ pavan’ ’e strunze !
Nu bacio a cchi sta Citta’ ll’uffenda e ‘a delleggia
pecche’sape ca nu tene ne’ ordine e leggia,
e siccome ,ogne juorne lle fa’ ncocche sfreggio
se vva’ a llava’ machina ’a Funtana do Sieggio.
Cungratulazione a cchi tene na bancarella ‘e sei metre
e pav’’’o suolo pubblico pe’ mmanco nu metro
e auguri a cchi tutt’’e juorne ll’avessa cuntrulla’
mmece lle gir’attuorno e nun c’’o vva’ a cuntesta’.
Auguri a cchi cerca’ nu sussidio ‘o Cumune
e tene nu cunt’’a’ bbanca c’arriv’’e miliune
e augurie a cchi lle molla subbeto ‘o piezzo
levannelo a cchi campa, overamente, ‘nt’’e pezze.!
Na mmeraglia a cchi da’ fatica ‘e disuccupate
e ‘e licenzia doppo ‘n’anno ca ll’ha sfruttate,
e doppo ca ll’ha rato nu stipendio ‘e miule
lle da’ pe’ liquidazione nu bbello cauce ‘nculo !
N’abbracio a cchi va’ ‘nchiaccanno monumente e palazze
scrivenno che ‘a ‘nnammurata ‘o sta’ facenn’ascì pazzo
e scrivenno stu rumanzo ‘nchiacca tutt’’a Citta’,
tanto ce sta’ Retake ca ‘o vva’ a cancella.!
A cchi e’ turnat’azzecca’ ‘e manifeste ’e mmure
facennece turna’ a ‘e tiempe cchiu’ scure
vann’e cungratulazione e tutt’’a simpatia
pecche’ e’ stato cazzo ‘e ffa’ turna’ ll’anarchia.!
Nu vaso carnale a cchi jett’a mmunnezza
quanno vo’ isso cu tutt’’a ‘nnaturatezza
e chille ca dice ‘e usserva’ ‘a defferenziata
e po’ iench’ ‘o marciappiere ‘e mmunnezza ammiscata.
Augurie a cchi mmece ‘e mette ddoje cucchiare ‘e cauce
ne mette una sola , ma addo’ le pare e piace,
ma po’ ‘a fine quanno vaje a vere’
‘e cucchiar’’e cauce se ne fa’ pava’ tre!.
Cungratulazione a cchi ncopp’’a Riviera
ncopp’’e panchine ce lassa butteglie e bicchiere
e nn’abbraccio carnale a cchi ss’affaccia ‘a ringhiera
e votta ‘e muzzune nt’’e ffrasche pe’ ffa’ corre ‘e pumpiere.
A cchi a S.Angelo in Audoaldis ce va’ a piscia nterra
ss’ammereta na mmeraglia chell’‘e mmerda,
ma quanno piscia ncopp’e culonne e ‘o purtone
ss’ammereta ‘e ìì a piscia’ nt’’a cella e reclusione.
Nu premio ‘ndenaro a tutte chille ciucce
ca ienchen’’e mmunnezza ‘a casa ‘e Martucci
e a cchille ca ‘nchiaccan’’o munumento tutt’’e juorne
mettenne ‘nfaccia a Citta’ ‘o russore d’‘o scuorno.
Si cc’avesse venì pe’ capo a Riccardo Muti
e’ turna’ a Capua comm’a scunusciuto
a vere’ chiste sfregge fatte ‘o maestro Giuseppe
ce mettesse c’’a capa dint’’o zì’ peppe.!
Augurie a cchi jett’’a mmunnezza ‘a Piazza Mercato
‘ncopp’’o marciapiere ca mmo’ e’ stato ‘nnaurato
e nu vaso carnale, ma veramente carnale
a cchi a’ ghietta’ quase int’’a Cattedrale.!
E manc’a ffa’ apposta ‘a stessa scena
se vere annant’a cchiesa da Maddalena,
allora na stretta ‘e mano a cchi avessa fa’ quaccosa
mmece ‘e penza’ sulo ‘e ccose verrezzose.
Cungratulazione a cchi vene ’a venner’’a fora
e salute a tutte chille signure e signore
ca ll’assegnan’’o posto, cu pruvvedimente spiciale,
proprio annante ‘e vennitore locale.
Nu saluto caro a cchi vva’ a piglia’ a’ penzione
e ce trova ll’addiziunale p’’o cumune ‘ntribulazione
e nu saluto ‘a Regione che cu cchesta furbizia
se piglia sti sorde pe’ ss’aumenta’ ‘e vitalizie.!
Salute a cchi parcheggia ‘a fora de striscie
pecche’ ‘e ll’ordine da Citta’ nun se ne ‘nfischia
e nu saluto a tutt’’e cuntrullore mezacanne
ca veren’ ‘e striscie blu pure addo’ nun ce stanno.
Salute e baci a cchi co stereo aizato
rompe ‘o suonno e ‘o ..azzo a cchi sta malato
e cche quann’’e e’ repegliato cu bbone parole
te minaccia pure ‘e te romper’’e mmole.!
Nu pensiero gentile pe’ tutte ll’assenteiste,
ca do vint’’e gennaio so’ guardat’’e vvista,
e a ‘e senature e a ‘e deputate pianofurtiste
ca votano senza decenza pe’ cchi sta’ a “cchi ll’ha visto “ !
Augurie sincere e nu vaso carnale
a tutte cchille ca so’ evasore tutale
e nu rengraziamento,‘e core, a stu stato miulo
ca a cchi pava ‘e tasse lle sta’ a ffa’ tant’’o culo.
Salute e baci ‘a Regione ca c’’o Piano Ospedaliero
pe’ malate sta’ facenno peggio d’aiere,
e a cchi,’o pronto soccorso, sta’ ‘ncopp’a na barrella
doppo na semmana se fa’pur’’a cartella.
E cchesta e’ Capua ,figlia ‘e st’Italia
addo’ se parla sul’ ‘e pallone e de baccanalie,
chesta e’ ‘a Citta’ ll’antica Rigina
ca mo’ cerc’a lemmosena c’’o piattino.
Ma nunn’e’ e’ sulo na Citta’ dormitorio
assumiglia, a verita’, cchiu’ a nu murtorio
pur’’o Cimitero, cu ‘e lumine appicciate,
e’ assaje cchiu’ vivo ‘e sta Citta’ ammasunata.
E mmo’ vve dico, appriesso, pure pecche’!
Avita sape’ che a Capua :
commo barbarea accussì nataleia,
commo natalea accussì carnevaleia,
commo carnevaleia accussì pasqueia,
commo pasqueia accussì ferrausteia,
commo ferrausteia accussì defunteia,
commo defunteia accussì ‘mmaculateia,
commo ‘mmaculateia accussì barbareia
Ma mo’ nun da’ retta e nun ce penza’
pe’ sta semmana pienze sul’a bbevere e a magna’
chiste so’ ‘e ghiuorne da grande cuccagna
addo’ ce vo’ vino e nu ruoto ‘e lasagna.
Ma po’ quann’e’ fernut’’a festa
e torna n’ata vota ‘a soleta menesta
tu llicuordate ca finche’ nu ttorno
he’ lutta’ pe’ Capua tutt’’e sante juorne.
He’ lutta’ pe’ ffa’ turna’ ‘a giustizia e ‘a dignita’,
pecche’ senza ‘e lloro sta Regina ha cunusciuto guaie e arruina !
Ma mmo’ e’ ‘o mumento ‘e te lassa’ o mia amatissima Citta’
pecche’ sta festa nun vvale si nun mmore Carnevale.
Ma primmo ‘e te stregne forte forte e te lassa’ sti verze stuorte
te voglio augura’ n abbona sporta da cchiu’ bbella ‘e tutt’’e sciorte.
Ma allicuordate chello ca tagg’’a rraccumannato !
Si nun vuo’ essere ìmbrugliato nu durmì e statt’allertato !
‘O destino ‘e Capua vva’ cagnato ! Hadda passa’ chesta nuttata !!
Mmo’ penzo ca tt’aggi”a sfateriato pe’ chello ca tt’agg’’a cuntato,
ma si vuo’ cunosce ll’ate pastette he’ aspetta’ si DDio vo’, ‘o duimilaediciassette !
Camillo Ferrara
Capua gennaio – febbraio 2016

 

 


La APP aCapua è disponibile GRATUITAMENTE su: app-store google-play